第一次做殺手（上）
我接咗一個任務，殺手嘅任務。
聽落係咪好有型、好神秘，再加啲殘酷同恐怖？
件事係咁嘅，我叫阿成，人如其名，應該係一個好成功好傑出嘅男人。
但奈何蒼天無眼，我遇到嘅老闆，都唔賞識我，唔肯畀高人工我。
我都有Send過Email去啲跨國企業，問佢哋有冇興趣請穿我做總裁、副總裁、總監……但即使我將我嘅要求降到「經理」，都冇人請我。
只可以話，大公司真係好死板，講嚟講去都係講學歷、講工作經驗，咁樣咪會錯過我呢種真正嘅人才囉。
扯遠咗，總之，我暫時未做到總裁，我當然唔甘心打份平庸嘅工。
所以當我要用錢嗰陣，我就會去打吓散工，唔駛返工嗰陣，就喺屋企打吓機。
順帶一提，我打機好勁㗎，我鍾意玩刺客，來無蹤去無影，喺陰暗中收割對手嘅性命。
可惜，無論屋企人、朋友定女友，都唔了解我遠大嘅志向、過人嘅才華。
前排我女友詩詩仲話我冇上進心，我同佢嘈咗一場大交，分咗手，女友變成前女友。
唉，每個成功人士，喺成功之前，都難免被誤解甚至鄙視，我明嘅。
分手後，無人管東管西，我就有更多時間打機。
後來，我喺遊戲中識到一個朋友，佢叫孤獨的狼，係一個戰士，技術一般，不過課金唔少，出手都幾大方。
有一次，我同獨孤的狼傾遊戲技術，佢對我嘅技術讚嘆不已，
然後講：「你分析力咁強，反應又快，現實中肯定係一個好勁嘅人。」
我有啲沾沾自喜：「係啊，好多朋友都好崇拜我，好多女仔愛慕我，不過我個人就比較低調，唔鍾意炫耀嘅。」
「你就好啦，我自細就手腳慢，讀書又唔叻，冇乜朋友。」
孤獨的狼打出一行字：「如果唔係我阿爺留低幾層樓畀我，我早就餓死咗。」
我第一時間嘅諗法，係「留幾層樓畀你，仲唔算好，我都想有幾層樓啊」。
但我要維持高手嘅形象，只可以壓低心中嘅嫉妒，淡淡然咁講：「咁你都幾可憐，以後有咩要幫手，就出聲啦。」
「其實，真係有件事。」孤獨的狼突然講。
原來，佢上個月俾一隻芝娃娃咬親，雖然芝娃娃好細隻，但孤獨的狼都被嚇到落荒而逃。
孤獨的狼懷恨在心，居然想買凶殺狗。
「吓？」我呆咗。
「五十萬，買佢一條狗命。」孤獨的狼仲附上一張狗相，相中嘅狗好細隻。
我難以置信：「你講笑咋掛？」
然後，孤獨的狼買咗一萬蚊點卡畀我，話呢個係「誠意費」。
我感受到佢嘅誠意，但我忍唔住問：「咁細隻狗，你一腳都踢得開啦，點會俾佢咬到？唔通你有殘疾，定你好細個，或者係女仔？」
點知，獨孤的狼答：「從你接受任務開始，我哋之間就係殺手同僱主嘅關係，殺手唔應該知道僱主嘅身份。」
殺手，我係一個殺手！
呢個咁有型嘅稱呼，頓時激起我心頭嘅熱血。
而且，如果我賺到五十萬，我就可以證明畀大家睇，我係一個有本事嘅人。
話唔定詩詩都會回心轉意，返嚟我身邊，跟住我再用嗰五十萬做生意，賺五百萬、五千萬……諗吓都覺得正。
唔講咁遠住，我都係先研究吓，點樣賺到嗰五十萬。
我根據孤獨的狼畀嘅地址，去咗一間村屋，搵到「目標人物」。
芝娃娃養喺村屋嘅圍欄裡面，平時冇人看管，我試過從圍欄裡伸隻手入去，都可以摸到隻芝娃娃。
我影埋相畀孤獨的狼睇，確定得罪佢嘅，就係眼前呢隻芝娃娃。
孤獨的狼入咗五萬蚊畀我，算係「落訂」。
孤獨的狼仲建議，我可以喺肉裡落老鼠藥，丟落圍欄中。
總之，無論我用咩方法都好，都要拍片影到係我做嘅，再Send畀孤獨的狼，先可以收埋尾數。
下集：https://bit.ly/3074R9v
將專頁設定為「搶先看」/ "See first"，最新故仔馬上睇！
點算，啲喪屍俾人食晒：https://goo.gl/Fxd2Pj
當我發現世界係一場騙局：http://bit.do/e7FTE
#短故 #短篇 #小說 #陳美濤 #廣東話 #粵語 #tomatochan #第一次做殺手
Search